ORMOC CITY – Niabot sa kantidad nga PHP164, 764.00 ang 24.65 gramos nga nakompiskang illegal nga drugas gikan kang alyas “Brando,” 49 anyos nga residenti sa Mabini Street, Brgy. South, syudad sa Ormoc.
Ang buy-bust gipahigayon didto sa nahisgutang lugar niadtong Hunyo 3, 2025. Ang suspek nalakip sa listahan sa Regional Priority Target (RPT).
Gilunsad ang operasyon mga 9:07 sa gabii sa mga miembro sa Ormoc City Drug Enforcement Unit kauban ang Ormoc City Police Station 1, Ormoc City Intelligence Unit, City Intelligence Team Ormoc ug Regional Intelligence Unit 8.
Nakumpiska gikan sa posisyon sa suspek ang duha (2) ka pakete sa gidudahang shabu, ang five hundred pesos (PHP500.00) nga salapi nga maoy buy-bust money; ingon man usab ang lain pang tolo (3) usab ka buok nga 500-peso bill nga maoy “bogus money” atul sa operasyon.
Ang mga ebedinsya labi na ang gidudahang illegal nga drugas gisumiti sa Ormoc City Crime Laboratory para sa Chemical Examination. Samtang ang nasikop nga suspitsado gidala sa Ormoc City Police Station 1, diin siya gikustodiya. Kaso kontra illegal nga drugas ang atubangon sa suspek partikular ang Section 5 ug 11 sa RA No. 9165 , tungod sa pagposisyon ug pagbaligya niini. (Ni Josie Serseña / EV Mail JUNE 9-15, 2025 issue)
