ORMOC CITY – Gipahigayon niadtong Marso 17, 2023 ang pag pirma sa kontrata sa paga himuon nga 2MW Bao Hydroelectric Power Plant Project sa LEYECO V.
Usa sa gika hinaman nga benipisyo sa projekto mao ang trabaho nga moabot sa 400 ka tawo. Manual labor busa mga 80-90% ang pa trabahuon labi na pag sugod sa konstruksyon ug maga gikan mismo sa barangay. Ingon man ang pag ubos sa bayranan sa koryenti, pag lambo sa tourismo, ug uban pang mga matagamtam sa projekto.
Ang planta mahimutang sa Brgy. Masarayao, Kananga, Leyte ug moagi sa Brgy. San Ignacio sa maong lungsod ug ang Brgy. Nueva Vista sa Ormoc City. Target nga mahuman kini sulod sa duha ka tuig, nga pagasugdan na sa dili ma dugay human sa pag pinirmahay.
Nisalmot sa Contract Signing ang taga ECOGEN Renewable Energy Corporation pinaagi ni Mr. Renault Lao (President) og Atty. Oliver Dicdican (Legal); Meadowland Developers, Inc. nga gi representahan ni Engr. Michael Cañete (COO) og Atty. Al Romero Josol (Administrative Legal).
Sa habig sa LEYECO V, mao ang Board of Directors nga gipangulohan ni Dir. Emmanuel Arpon, Atty. Jannie Ann J. Dayandayan (GM), Engr. Michael Guinarez, (PGU) Chairman and Corporate Planning and Energy Trading Department Manager, og Atty. Ari Larrazabal (Legal Counsel).
Gisaksihan usab sa mga Board of Directors, Department Managers ug mga miembro sa Power Generation Unit.
Ang operasyon mag basi sa tubig gikan sa sapa sa Bao nga maoy gamiton sama sa pag tuyok sa turbina. Giklaro sa mga experto atul sa Press Conference nga walay tubig nga mawala kay mobalik ra sa sapa. Ug giistudyohan nila kini pag maayo, gani kanunay gisukod ang lebel sa tubig sa Bao River; ug nipasar sa pag tuon nga bisan pa og mohowaw (ting init), dunay igong gidaghanon gihapon sa tubig.
Milyones man ang kantidad sa projekto pero ang balos mao ang pagka barato unya sa koryenti ngadto sa tag PHP 5.70 per KWH sa unang 11 ka tuig og PHP 3.80 sa mosonod nga mga tuig. Mo menos napod unya ang gitawag nga systems loss kay mobo naman ang byahian sa koryenti, dili sama karon nga taas og layo kaayo ang linya nga latason sa transmisyon. Labaw sa tanan bisan kon may masinati nga kalamidad duna pa gihapoy mahimong koryenti kay “hydro” man o tubig ang gigikanan o gamit sa operasyon. Gilauman nga mahimo pod nga tourist destination ang maong 2MW Bao River Hydroelectric Power Plant kay daghang mag interes para sa educational nga aspeto, apil na ang kalabot sa gitawag nga eco-tourism. Ni Josie Sersena (EV Mail March 20-26, 2023 issue)
