ORMOC CITY – Padayon pa karon ang imbistigasyon sa Ormoc City Police Office (OCPO) kabahin sa nahitabong pagdagit sa usa ka batan-ong babayi. Basi kini sa nakuhang kasayoran gikan sa kasaligang tinubdan sa headquarters sa OCPO.

Una nang nag sumiti og report ang hepe sa Police Station-1 (PS-1) alang sa PNP-City Director sa matud pa “alleged kidnapping and illegal detention”. Nag kanayon nga nahitabo ang insidenti mga alas 8:00 sa gabii niadtong Augusto 7, 2022 sa Brgy. Bantigue ning syudad. Og nareport sa kapolisan pagka Augusto 8, 2022 mga alas 7:40PM.

Ang complainant usa ka Eugene Perez y Fabroa, 41 anyos, residenti sa Purok Fortune, Brgy. Camp Downes, Ormoc City. Samtang ang biktima mao si Daynah Gene Perez y Otadoy, 15 anyos, grade 10 student og nag poyo sa nahisgutang dapit.

Asoy sa ginikanan ngadto sa autoridad nga sa nahisgutang oras og lugar gkidnap ang bata sa mga suspitsado sakay sa puti nga van nga walay plaka. Apan gibalik ra kini mismo sa mga suspek pagka buntag sa August 8 didto gihapon sa Brgy. Camp Downes; pila ka metros lang gikan sa ilang pinoy-anan.

Gipangutana ang biktima sa police kinsa nitug-an nga gidala siya sa abandonado nga lawak, walay mga kagamitan bisan furnitures. Samtang ang mga suspitsado nagsigig pakisayod kabahin sa iyang amahan kon hain, apil na ang personal nga mga impormasyon. 

Gidala dayon sa pamilya ang biktima sa OSPA-Farmers Medical Center para sa physical examination. Sa resulta, walay ilhanan nga gi abuso o gi molestya kini. Ang biktima nahibalik na karon sa kustodiya sa iyang pamilya “in good physical condition” base sa police report sa PS-1.

Sa testimonya pa sa batan-ong biktima nga dili niya pamilyar ang lugar nga gidad-an kaniya, og dili siya makaila o makatol-tol niini. 

Sa imbistgasyon usab, matud pa nga nag padala ang suspek og mensahi sa amahan sa biktima nga anaa sa ilang kamot ang anak; ug buhi-an lang nila kini kon mag pakita kanila ang amahan nga si Eugene Perez. Padayon pa karon ang imbistigasyon sa PNP kabahin sa insidenti, aron masayran ang motibo; diin hangtod karon “unidentified” pa ang mga suspitsado. Ni Josie Sersena (EV Mail August 8-14, 2022 issue)