ORMOC CITY – Laing operasyon kontra illegal nga drogas na usab sa kapolisan ning dakbayan ang ni resulta sa pagka sikop ni alyas ‘Kulot’ o John Christian Edusma, 38 anyos, nga taga OSCO Compound, Brgy. Ipil, Ormoc City.

Ang buy-bust operation gilunsad niadtong Inero 21, pasado alas siete sa gabii (7:09PM) sa may World Vision, Brgy. Ipil pinaagi sa hiniusang pwersa sa taga Police Station-6 (PS-6) sa pag panguna ni PCPT Beverly Ann Barredo og ug Police Station-5 (PS-5) ubos kang PCPT Rodolfo Mercolita. Kauban usab ang taga CDEU, CIU, ug OCFMC nga maoy nag silbing perimeter security.

Naaresto ang suspek dihang nabaligyaan niya ang police nga nag paka aron ingnon nga mo palit ug illegal nga droga balor og usa ka libo ka pesos (PHP 1,000.00). Sa paga ikop kaniya gibasahan kini og doktrina alang sa iyang mga katungod.

Nakuhaan si ‘Kulot’ og mga ebidensya sama sa tolo ka medium nga paketi sa gituhuang shabu ingon man ang buy-bust money nga usa ka libo ka pesos (PHP 1,000.00). Duna usab kwarta sa nagka lain laing denominasyon nga mo total sa PHP 320.00. Ning pag balita, tanggong pa sa pasilidad sa PS-6 ang suspek nga nag atubang sa kasong paglapas sa RA 9165, o ang Comprehensive Dangerous Drugs Act. Ni Josie Sersena (EV Mail January 23-29, 2023 issue)