ORMOC CITY – Sikop sa buy-bust operation sa taga Ormoc City Police Station 4 (PS-4) ang usa ka babayi kinsa matud pa nalambigit sa pagpamaligya ug illegal nga drugas.
Ang operasyon gipasi-ugdahan sa PS-4, ubos sa liderato ni Police Captain Jason N. Mateo, nga nakig kolaborasyon sa Philippine Drug Enforcement Agency (PDEA), diin ni-resulta sa pag kasikop sa suspek didto sa Brgy. Linao ning dakbayan niadtong Inero 23. Giila sa autoridad ang suspek nga si alyas “Sol,” 49 anyos, minyo ug walay trabaho. Lomolopyo ra usab siya sa nahisgutang barangay og nalista isip lakip sa mga street level individuals (SLI).
Nakuhaan siya ug upat (4) ka heat-sealed transparent plastic sachet, ug laing usa (1) pa ka gamay nga paketi nga dunay sulod sa gidudahang shabu, ingon man usab ang usa (1) ka genuine five-hundred-peso bill (PHP500.00) nga gigamit nga buy-bust money, ug pitaka nga sudlanan sa sinsilyo.
Ang nakompiska nga mga ebidensya gi-turn over sa Ormoc City Forensic Unit. Samtang gihikay na ang criminal complaints para sa suspek batok sa sections 5 ug 11 ubos sa RA No. 9165 (Comprehensive Dangerous Drugs Act of 2002) nga gi-amendar nga RA No. 10640 (An Act that Further Strengthens the Anti-Drug Campaign of the Government). (Ni Josie Serseña / EV Mail JAN. 20-26, 2025 issue)
