KANANGA, LEYTE – Nahulog dayon sa kamot sa operatiba ang bag-ohay pa lang ni entra sa pag baligya sa illegal nga drogas human sa gi lunsad nga buy-bust operation, gabii niadtong Mayo 21, didto sa Brgy. Natubgan ning lungsod.
Ang maong operasyon gipangulohan sa mga elemento sa Kananga SDEU ubos kang Police Major Romeo Sudario, Jr. ug ni resulta sa pagka aresto sa suspek nga usa ka Street Level Individual (SLI). Giila kini nga si Charles Kien Tirrado alyas “Poyo,” 29 anyos, usa ka construction worker ug residenti sa Zone 3 sa Brgy. Natubgan, Kananga, Leyte.
Ang usa ka miembro sa kapolisan sa lungsod nag silbing poseur buyer diin naka palit sa suspek ug usa ka gamay nga selyadong pakete nga may sulod nga “white crystalline substance” o ang gidudahang “shabu.” Unya atul sa body search, nakuha kaniya ang gidudahang drogas, diin gi saksihan sa media ug barangay official. Ang nakuhang unom (6) ka pakete gibana bana nga dunay gibug-aton nga .9 gramos ug mibalor sa kapin sa six thousand pesos (PHP6,500.00). Ubos na si alyas “Poyo” sa kustodiya sa Kananga Municipal Police Station, kinsa nag atubang sa kaso kontra RA 9165 o ang paghupot ug pag baligya sa illegal nga drogas. Ni Josie Sersena (EV Mail May 20-26, 2024 issue)
