VILLABA, LEYTE – Usa ka insidenti sa pagpamusil ang girespondihan sa Villaba Municipal Police Station ubos kang Police Major Ian Salvador B. Po didto sa National Highway sa Brgy. Cabunga-an (A. Tumamak), Villaba, Leyte, niadtong Mayo 28.
Napalgan ang biktima nga nagboy-od na sa karsada tapad sa iyang motorsiklo. Nagkadugo kini ug may samad sa ulo agi sa bala nga nilapos sa ilawom sa wala nga ilok. Giila ang biktima nga si alyas “Makoy,” 36 anyos, kasamtangan nga Kagawad sa Brgy. Sulpa, Villaba, Leyte.
Base sa inisyal nga imbestigasyon, ang biktima kay pauli na unta sa lungsod dihang kalit may duha ka wa mailhing lalaki sakay sa motorsiklo ug nipusil ang backrider ngadto sa biktima. Dayon dali kining nisibat palayo sa lugar sa wala masabti nga direksyon.
Naglunsad dayon ug “hot pursuit og dragnet operations” ang Villaba MPS. Nakig-lambigit usab ang mga autoridad sa Scene of the Crime Operatives (SOCO) para i-proseso ang lugar sa krimen, ug sa Municipal Health Officer para sa post-mortem examination.
Nagkanayon si Po nga, “Mariin naming kinokondena ang ganitong uri ng karahasan. Ang Villaba MPS ay patuloy na magsasagawa ng masusing imbestigasyon at lahat ng kinakailangang hakbang upang matukoy at mapanagot ang mga salarin. Hinihikayat din namin ang publiko na makipagtulungan at agad na magsumbong kung may nalalaman silang impormasyon ukol sa insidenteng ito.” (Ni Josie Serseña / EV Mail May 26-June 1, 2025 issue)
