ORMOC CITY – Ang kaaligri sa pag pangaligo sa upat ka batang lalaki napolihan ug kaguol ingon man kahadlok human malumos ang usa nila ka kauban.
Ang biktima mao si alyas “Jalyb,” 9 anyos, grade 4 pupil sa Cogon Central School nga taga Purok 5, Jica Lao ning syudad.
Nahitabo ang insidenti didto sa sapa sa Sumag sakop sa Brgy. Cogon, mga alas 12:15 sa udto niadtong Marso 14. Sa report sa Police Station-1 (PS-1) matud pa nga samtang nangaligo ang biktima kauban ang tolo pa ka classmate og amigo nga nag edad sa 10 og 7 anyos, naabot si Jalyb sa lawm nga bahin sa sapa.
Naka tawag og rescue team nga maoy nagdala sa biktima ngadto sa Ormoc District Hospital apan gidiklara nga dead on arrival (DOA) ni Dr. Nelson Udtohan, Jr. Usa sa mga bata nga gika uban sa biktima ang naabtan sa EV Mail didto sa PS-1 samtang kauban ang inahan nagkanayon nga, dili niya ma kalimtan ang nakita nga sitwasyon ug hitsura sa amigo pagka lumos nga nisiga ang mata. Plano nga ipa ilawm sa medikal ug mental nga interbensyon ang mga bata aron maibanan ang gi bati nga trauma o kalisang. Ni Josie Sersena (EV Mail March 13-19, 2023 issue)
