ORMOC CITY – “Dead on arrival” na sa Ormoc District Hospital ang singko anyos nga batang lalaki nga giingong nalumos didto sa Brgy. Lake Danao niadtong hapon sa Julyo 18.
Ang biktima nailhan nga si Christian Tabodlong y Laurente, taga Purok 7 sa nahisgutang barangay ning syudad.
Mga alas 7:30 sa gabii dihang nakadawat og tawag gikan sa OCPO ang Police Station 5 sa Brgy. Dolores nga nagpasabot kalabot sa incidenti, diin gisusi dayon ni IOC Pat. Gerald Manaog. Gibana-bana nga mga alas 4:00 sa hapon nahitabo ang incidenti.
Si Mamerto Tabodlong, amahan sa biktima, ni tug-an nga samtang didto siya sa ilang panimalay, nidangat ang ilang silingan og nagtaho nga aksidinting nalumos ang iyang anak didto sa lawa (lake). Dali siyang niadto sa nahitaboan og sa iyang pag abot, gisuwayan na ang bata pagluwas (revive) sa lifeguard nga si Ramil Narciso.
Asoy pa sa igsuon sa bata nga si Angelo Tabodlong, sais anyos, nga kauban sa iyang manghod nga si Christian niadto sila sa tumoy nga bahin sa lake partikular sa gitawag nga “Inawasan” aron maligo. Niambak ang biktima sa lawom nga bahin sa tubig apan pagka taodtaod mao nay iyang nakita nga nilotaw na kini.
Usa sa ilang mga silingan ang nakakita og dali kining gibira aron mahaw-as sa lawa og gidala sa sementado nga lugar. Dayon gipahigayon sa lifeguard on-duty ang pag CPR. Ingon man nagtawag sa Rescue Team gikan sa syudad. Nadala pa sa pampublikong tambalanan ang biktima nga si Christian Tabodlong pero gidiklara sa doktor nga wala nay kinabuhi sa pag abot. (Ni Josie Sersena, EV Mail July 18-24, 2022 Issue)
