ORMOC CITY – Gibisita nila Atty. Luke Espirito, Roberto “Ka Dodoy” Ballon ug Leody De Guzman ang mga mag-uuma sa Ormoc City niadtong Abril 4, 2025, diin nagpahigayon pod sila ug panagtigum didto sa Covered Court sa Brgy. Donghol sanglit silang tolo nangandidato pagka Senador karong midterm election sa Mayo 12, 2025.
Eksklusibo silang naka hinabi sa EV Mail, diin nag-una sa ilang panuyo sa pag-bisita sa dakbayan mao ang isyu sa mga mag-uuma nga benepisyaryo sa reporma sa yuta o Agrarian Reform. Gani gipangunahan nila ang opisyal nga pag-instalar pinaagi sa pag-ugbok ug mga karatola, pag-matuod nga ang maong mga yuta gipanag-iya na sa mga hingtongdan nga mag-uuma.
Sayod silang tolo sa isyu nga gisagubang sa mga mag-uuma sa nasud, sama sa pagpang-lupig, pang-hasi ug pangdaog-daog sa mga haciendero, aron ma ilog pagbalik ang yuta nga gihatag na sa gobierno ngadto sa mga mag-uuma. Ang tolo ka kandidato na ila na nga kampeon sa pakig bisog sa isyu sa pagpanarbaho (labor), mag-uuma ug mangingisda.
Pulong nila nga panahon na nga magmata ang mga Pilipino ug ipakita ang kusog sa sektor nga marepresentahan didto sa Senado; kaysa naandan nga pilion sa botante ang mga sikat, artista ug kwartahan. Unta pilion na sila nga tinuoray nga nagpakabana sa kabus ug naglaraw pagbatok sa gitawag nga climate change.
Ila usab unyang paniguruon nga molambo ang agrikultura sa nasud aron madasig ang batan-ong henerasyon, kay nabalaka sila nga 5-10 years gikan karon wala nay mag-uma ug managat sa Pilipinas. Dako ilang pagsalig nga abunda ang nasud sa produkto sa umahan ug kadagatan basta magka-hiusa pagpili sa insaktong lideres nga may kasing-kasing para sa pobring sektor. (Ni Josie Serseña / EV Mail March 31-April 6, 2025 issue)
