ORMOC CITY – Aron walay ginokoray nga mahitabo tali sa mga motorista og autoridad, tahoron lang gyud unta ang balaod.
Sa bisan unsa nga law enforcement labi na kon dunay checkpoint onya dili mopa hunong sa sakyanan ang driver kon e ‘flag down’, sagad kini gyod ang dangatan. Mas dilikado pa sa disgrasya, ang hugtanon nga gi isplikar sa Land Transportation Office (LTO).
Niining simanaha nasaksihan sa EV Mail ang usa ka dakong truck (wing van) nga gigokud sa patrol service sa LTO. Gilabyan diay niini ang nag checkpoint sa National Highway sa may Brgy. Cabulihan, og naapsan dapit na sa Brgy. Valencia.
Hinuon usa ka libo (Php 1,000) ra ang multa sa “Disregarding a Traffic Enforcer”, pero ang kasagaran rason nganu moikyas o molihay sa checkpoint labi na ang dagkong truck kay walay insaktong papeles, sama sa prangkisa, expired ang rehistro og daghan pang uban nga rason.
Matud ni Manny Sevilla sa LTO-Ormoc, ang ‘Truck Colorum Operation’ two hundred thousand pesos (Php 200,000) ang multa. Gukoron gyod kay alang sa enforcers duna silay violations, rason nga wala nila tohoe sa driver ang pag ‘flag down’ niini.
Sa laing bahin, ang pang publiko nga sakayanan nga dili mahatod sa insaktong destinasyon ang pasahero may pahinumdom ang LTO. Kung i reklamo na sa LTO unya makompirma sa imbestigasyon nga ni likay ang driver tungod kay naay dakop; ang multa naa sa six thousand pesos (Php 6,000) sa “Failure to convey passenger to proper destination”, dugang pa ni Sevilla. Na obserbahan dinhi sa syudad nga daghan ang mga pang pasahero nga sakyanan labi ang multicab nga dili na molahos sa destinasyon o kaha mag lahi og rota kon dunay operasyon ang law enforcers sama sa LTO. Ni Josie Sersena (EV Mail August 8-14, 2022 issue)
