ORMOC CITY – Nagka dugo dihang nahagba sa karsada ang usa ka lalaki human kini gipusil mga alas siete pasado sa buntag (7:55 A.M.) niadtong Abril 20 didto sa may Burgos Street sakop sa Sitio Sabang (Brgy. District 2) duol sa merkado publiko ning syudad.
Ang biktima giila nga si Christopher Toledo y Miting, hingkod ang panuigon, taga Brgy. District 1, ug nag trabaho sa LGU isip usa ka Job Order nga na assign pagka dispatser sa terminal ning syudad.
Dali nga ni respondi ang Ormoc Rescue Unit nga maoy nagdala sa biktima ngadto sa pinaka duol nga tambalanan (Ormoc Doctors Hospital), apan human sa pila ka oras nakabsan kini sa kinabuhi.
Base sa police blotter, nag sakay sa iyang bisekleta si Toledo, dihang may lalaking nag lakaw nga kalit mi posil kaniya. Sa pag imbistigar sa kapolisan didto sa nahitaboan walay naka ila sa suspitsado nga daling nisibat paingon sa wala usab masabti nga diriksyon sakay sa single nga motor.
Diha-diha dayon nag pahigayon og “hot pursuit operation” ang kapolisan sakop sa Police Station-1 apan wala nila madakpi ang suspek niadtong higayona. Nag padayon pa ang imbistigasyon sa kaso, diin blanko pa usab ang pamilya og ang autoridad sa motibo sa suspek pag posil patay kang Christopher Toledo. Ni Josie Sersena (EV Mail April 17-23, 2023 issue)
