ALBUERA, LEYTE – Naabo sa sunog ang usa ka dos andanas nga residensya nga gipanag-iya ni Socrates Villanueva og Ivanne Villanueva sa Real Street, Poblacion, lungsod sa Albuera.

Dali nga ni respondi sa incidenti ang personnel sa Albuera Fire Station ubos sa superbisyon ni SFO4 Anacleto S. Tesado, Jr., ang OIC-Municipal Fire Marshall.

Sigun sa report sa bombero nga nag sugod ang sunog mga ala una pasado sa hapon (1:35 P.M.), Abril 16, diin gisaka kini sa unang lebel sa alarma pinaagi sa Ground Commander nga si SFO1 Edito Ramada II.

Nakontrola ang dugang pag ulbo sa kayo nga dili na maka tabok pa sa laing istruktura, hangtod nga hingpit nga napawng ug gi diklara nga “fire out” pagka alas tres (3:00 P.M.).

Kauban sa Albuera BFP ang abtik nga pag respondi sama sa Ormoc Fire Station, ingon man usab ang Albuera LGU sa pag panguna ni Mayor Sixto Dela Victoria og mga empleyado sa Municipyo, PNP, MDRRMO, mga Opisyales og Tanod sa Brgy. Poblacion, Traffic Unit, RHU, Concrete Stone Corporation Company, bisan mga pribadong tindahan ug sa lungsod nag tinabangay. Sa kinatibuk-an gipasalamatan ra gihapon nga walay kinabuhi nga naangin sa hitabo. Dugang pa sa Albuera Fire Station nga padayon pa ang ilang imbistigasyon sa hinungdan sa maong sunog ug ang total nga danyos. Ni Josie Sersena (EV Mail April 17-23, 2023 issue)