ORMOC CITY – Nibutho sa buhatan sa Land Transportation Office kon LTO dinhi sa dakbayan ang driver kauban ang operator sa motorcab nga dunay body number nga 1593 dihang gi-patawag ang mga hingtungdan.
Agi kini sa paglapas sa balaod kalabot sa pampubliko nga sakyanan. Ang gipasikaran niini nga insidenti mao ang pagpa-kanaog sa maong driver sa inahan ug anak bisan paman kon una silang naka sakay tungod kay nag-apas ang driver sa unom (6) ka pasahero. Busa may pahinumdom si Mr. Manny Sevilla sa LTO-Ormoc para sa mga “amigo” o driver sa mga pang publiko nga transportasyon o de pasaheroan nga sakyanan.
Matud niya, “Kung makasakay na gani ang pasahero sa imo Tricycle/Sakyanan, obligasyon gyod na nimo nga ihatod sa iya destinasyon basta wala lang kakulian. Mao baya na ang ato katuyoan ang paghatag og Serbisyo Publiko sa ato mga sumasakay, ato sila ampingan (pasaheros) kay sila ang hinungdan nga naa ta panginabuhian.”
Dugang pa nga kung makalapas sa balaod sa Transportasyon adunay multa nga: First Offense, ang Driver kay PHP1,000.00 ug ang Operator kay PHP5,000.00. Gina-ingon nga sakit ang balaod pero unsaon man nga kinahanglan kini tumanon. (Ni Josie Serseña / EV Mail December 2-8, 2024 issue)
