MATAG-OB, LEYTE – Nadakpan sa kapolisan sa Matag-ob ang drug surrenderee sa silingang lungsod sa Kananga.
Human makig koordinasyon sa PDEA RO-8, gilunsad sa Matag-ob Police Station Drug Enforcement Unit sa pagpangulo ni PMAJ Arturo A. Salvacion ang buy-bust operation sa Brgy. Naulayan, Inero 28, mga alas 4:53 sa hapon.
Niresulta kini sa pagka sikop ni Camelo Garciano y Galo, 64 anyos, minyo, habal-habal (single motorcycle) driver ug residenti sa nahisgutang barangay. Naa siya sa listahan sa Street Level Individual (SLI) og taodtaod siyang gipanid-an sa autoridad. Matud niya nga niundang na siya sa bisyo gani ni surrender na siya sa Kananga Police diin didto siya kanhi nagpuyo sa Brgy. Tugbong. Karon natintal lang siya kay dunay nagpa baligya kaniya mga usa na ka buwan ang nakalabay. Wala niya nasabti nga autoridad diay ang iyang ka transaksyon o nag silbing kustomer.
Usa ka gamay nga paketi sa gidudahang shabu og nag kantidad sa five hundred pesos (PHP 500) ang napalit kaniya sa poseur-buyer.
Dihang gikap-kapan siya atubangan sa media og Barangay Officials, nakuha didtos bulsa sa iyang karsones ang walo (8) ka gagmay nga paketi nga may dugmok nga crystal sa gidudahang shabu. Gipasabot usab si Garciano sa hinungdan nganung gidakop siya dungan sa pagsaysay sa iyang mga katungod.
Ang mga ebidensya partikular ang gidudahang drogas gidala sa crime laboratory sa dakbayan sa Ormoc alang sa chemical analysis, samtang ang suspek gipa ubos usab sa drug test. Gibana-bana nga moabot kapin kon kulang sa 0.90 gramos ang na rekober sa iyang posisyon og nag kantidad sa ten thousand pesos (PHP 10,000).
Tug-an pa niya sa EV Mail nga kada PHP 500 nga pinaka gamay nga paketi, PHP 400 ang komprada nila sa source. Gipasalamatan ni Police Major Salvacion, ACOP ang ginsakopan sa ilang dedikasyon sa trabaho diin nag malamposon ang ilang mga operasyon.
Gihangyo niya ang kooperasyon og suporta sa katawhan sa Matag-ob pinaagi sa paghatag kanila og impormasyon kontra krimen labi na gyod ang mga tigpayuhot sa illegal nga drogas. “As we fight against drugs, we are fighting for the future of our next generation,” matud pa sa hepe nga si Salvacion. Gikasohan na ang suspitsado og paglapas sa Sec. 5 ug Sec. 11, Article II sa RA 9165 (Comprehensive Dangerous Drugs Act) kinsa nagpositibo usab sa gipahigayon nga drug test. Ni Josie Sersena (EV Mail Feb. 6-12, 2023 issue)
