ALBUERA, LEYTE – Ni lampos ang Albuera Municipal Police Station (AMPS), ubos kang Police Captain Julio G. Tamayo, Jr. pag aresto sa suspitsado batok sa pag hupot ug dili lisensyado nga armas ingon man ang illegal nga drugas; atul kini sa checkpoint didto sa Brgy. Poblacion, lungsod sa Albuera, niadtong Oktobre 15.
Giila sa kapolisan ang suspek nga si alyas “Em-em,” 34 anyos ug residenti sa Brgy. Benolho, sa maong lungsod. Nasayran nga nag montar ug dragnet checkpoint operation ang PNP kalabot sa nahitabong shooting incident sa Brgy. Tinag-an, Albuera. Gi para ang suspek kauban ang babayi nga angkas sa mga operatiba. Apan dihang gipangayo-an sa driver’s license ang driver, naka matikod ang mga police officers ug short firearm nga naka sukbit sa hawak niini hinungdan sa dali nga pag ka aresto kaniya.
Na kompiska sa iyang posisyon ang Smith and Wesson Caliber .38 revolver, nga puno sa unom ka round nga bala, wala kini serial number. Lakip sa nakuha ang itom nga pustanan (pouch) nga dunay usa ka “heat-sealed transparent plastic sachet” nga may white crystalline substance o ang gidudahang shabu. Duna usab kini cash ug uban pang ebedensya.
Human gipa sabot sa iyang mga katungod gidala na sa estasyon ug naa na siya sa kustodiya sa Albuera MPS. Subli nga gipasabot ni Tamayo nga seryoso ang kapolisan sa Albuera pakig gyera kontra sa kriminalidad aron pag mintinar sa malinawon nga komunidad. Ni Josie Serseña (EV Mail October 14-20, 2024 issue)
