ORMOC CITY – Usa sa kalampusan pagdumala ni Tomas R. Serafica sa merkado publiko dinhi sa syudad mao ang pagsaka sa koleksyon ug nakab-ot niini ang target sayo kaysa gitakda nga panahon.
Pagmatood lang kini sa ka lagsik ug buhi nga ekonomiya, kahapsay og anaa ang kalinaw sa kinatibuk-ang aspeto sa mga merkado sa dakbayan sa Ormoc, pulong pa ni Serafica dihang nahinabi sa EV Mail didto sa iyang buhatan.
Julyo ning tuiga dihang nahimong Administrador si Serafica human ang tolo ka termino nga pagserbisyo isip miembro sa Konseho dinhi sa Ormoc. Ug apil sa mga unang lakang nga iyang gibuhat pagtuhay sa merkado mao ang pag imbentaryo sa tanang mga pwesto og tindahan (locators), diin nadiskobrihan nga daghan ang walay business permit, ug wala na nagbayad sa abangan sulod sa dugay nga panahon.
May mga ordinansa usab nga wala maimplementar, mga landing fees sa mga wholesaler og entrance fees sa mga merchandisers ug uban pang mga obligasyon sa mga negosyanti nga wala na matagad. Apan karon daghan na ang nanglokat na kay dili pod maka renew sa 2023 kon dili ma sitol ang ilang mga balayranan, dugang pa niini.
Ang mga timbangan nga walay rehistro og depiktibo gipang kuha, giturnover sa opisina sa City Treasurer diin adto sila mobayad sa multa. Kon anaa may mamalik sa ingon niini ka hiwi nga pamaagi gipasalig niya nga padayon ang ilang pag monitor aron ma disiplina pinaagi sa mga naka assign nga personnel. Hasta na ang kahimtang sa sanitaryo, pag pag santa sa uban pang anomaliyo og palusot ang gitutokan sa kamerkadohan sa syudad.
Apil niini nga pag tuhay nga polisiya ang tanang building sa public market, bagsakan, food park, og uban pang area hangtod na sa mga kabarangayan. Gani dugang pa sa Public Administrator nga gidid-an na sa pag proceso sa merkado ang mga sorizo og uban pang processed food alang pag siguro sa kalimpyo og kalidad sa ilang gipang himo.
Bag-ohay pa lang pod pag ocular inspection sa Public Market og Satellite Markets, naka kompiska silag kapin sa 60 kilos nga puti nga sibuyas nga walay Sanitary and Phytosanitary Import Clearance. Ibalik lang kini sa nanag-iya kon maka prisintar sa mga dokumento pag matuod nga luwas kining makonsumo sa katawhan.
Base sa rekord karon nga gikan sa pito (7) ka building o kapin sa usa ka libo (1,103) ka locators/stalls, dunay 976 ang okupado, ug 797 ang may permit. May 193 ang walay permit, og 302 nalang ang “delinquent.” Pero sa 495 niini nga dunay kakulian sa mga necessary permits, 394 ang nisanong o nirespondi kay ni avail sa higayon og nanglokat. Busa sa kinatibuk-an kapin sa 90% ang kalampusan nga naangkon sa ekonomikanhong aspeto sa merkado sa Ormoc. Ni Josie Sersena (EV Mail December 12-18, 2022 issue)
