ALBUERA, LEYTE – Naka tu-aw si Kerwin Espinosa nga “God is good all the time” human siya makaluwas sa kamatayon dihang gipusil siya samtang nagpahigayon ug katiguman sa kampanya didto sa gymnasium sa Barangay Tinag- an niadtong Abril 10 pasado alas kwatro sa hapon.
Duguan siyang gidala sa tambalanan kauban ang samaran sad niyang igsuon nga si Mariel ug laing biktima nga teenager. Ang tolo ka mga biktima naka pauli na sa ilaha, ug nag-paalim na sa mga samad pinosilan. Sigun sa report sa Leyte Provincial Police Office (LPPO) nga naigo si Kerwin Espinosa sa ibabaw ug tuong bahin sa iyang dughan nga nilapos sa luyo sa braso. Samtang ang igsuon nga babayi dunay samad sa may wala nga dalunggan, ug ang minor de edad naigo sa may wala nga abaga niini.
Dugang pa sa PNP nga ang suspek nitira sa may dapit sa wala sa nahitaboan ug dunay 50 metros ang distansya sa stage sa maong gym. Wala pa matino ang armas nga gigamit pagpusil sa mga biktima. Padayon pa ang pagpalawm ug pagpalapad sa imbistigasyon sa maong kaso, sanglit gikonsidera sa autoridad nga may kalabutan ang nahitabo sa politkanhong kalihukan sa midterm election karong Mayo 12 ning tuiga.
Ang managsuon nga Kerwin ug Mariel Espinosa ni kandidato pagka Mayor ug Bise Mayor sa Albuera ubos sa bando nila nga Pundok Kausaban. Pero sa giluwatan nga pamahayag ni Espinosa sa social media nga bisan paman sa ilang gidangatan wala silay plano mo atras sa kandidatora. Labaw sa tanan walay plano ang ilang kampo pag-baws kon kinsa man ugaling ang suspitsado o ang nag-sugo. Hinuon nanawagan siya sa mga gobierno nga mahatagan siya ug ang iyang mga kaubanan ug seguridad.
Matud usab sa hepe sa kapolisan sa Albuera nga si Police Major Angelo L. Sibunga nga gihingosgan sa kapolisan sa lungsod nga mabutyag ang kamatuoran ug madakpan ang responsabli niini; hangtod nga makab-ot sa mga biktima ang hustisya. Ni-asisti na ang Regional Forensic Unit 8 alang sa imbistigasyon pinaagi sa pag-proceso sa crime scene ug pagkolekta sa mga ebedinsya. Nanawagan usab ang Albuera Municipal Police Station sa kooperasyon sa publiko alang sa kasulbaran sa kaso. (Ni Josie Serseña / EV Mail APRIL 7-13, 2025 issue)
