ORMOC CITY – Usa ka balay ang nasunog sa umahan nga gipanag-iya ni Dona Capuyan, sa Purok 6, Sitio Nipot-nipot, Brgy. Sto. Niño, ning siyudad.
Nahitabo ang insidenti niadtong Abril 5, Myierkoles Santo, mga kapin kon kulang alas 9:00 sa gabii.
Sa nakuhang impormasyon sa Duty Investigator nga si Senior Fire Officer-1 Fatima Grace C. Ramada, nadawat sa Ormoc Fire Station ang Fire Call mga alas 9:00PM. Dali nga ni respondi ang Ormoc City Fire Station Fire Fighting Unit sa pag panguna ni CINSP Darren P. Baclea-an, ang Fire Marshall.
Gidiklara nga fire under control pagka alas 9:37PM og human sa pito ka minuto gidiklara sa kabomberohan ning syudad nga fire out pagka alas 9:44PM.
Gibana bana nga nikabat sa nineteen thousand pesos ang danyos (PHP 19,125). Samtang gipahigayon pa ang dugang imbistigasyon aron pag tino sa hinungdan pagka sunog sa maong farmhouse. Hinuon “zero casualty” og walay naangol o kaha kinabuhi nga nakalas sa maong hitabo og luwas apil ang caretaker nga si Roger Adana. Dali nga naugdaw ang struktura kay hinimo kini sa light materials (amakan). Nasayran usab nga naka Red Alert status ang BFP ning panahona sa Semana Santa. Gibutyag nga Zero Incident ang BFP-Ormoc atul sa Fire Prevention Month niadtong nilabay nga buwan sa Marso. Apan pahinumdom ni SFO1 Ramada sa publiko nga mag matngon kanunay ang publiko, “extra care” gyod hilabi na kay summer season na. Mag binantayon sa mga electrical equipment o unsamang appliances, gadgets o butang nga magamit ang koryenti. Kon molakaw sama pananglit mag outing, siguradohon nga pamagngon o maayong e-ubos ang planka (breaker), aron ma likay sa disgrasya sa sunog. Ni Josie Sersena (EV Mail April 3-9, 2023 issue)
