KANANGA, LEYTE – Usa ka insidenti sa pagpamusil ang gi-respondihan sa Kananga Municipal Police Station, ubos ni PMAJ Romeo Q. Sudario, Jr., diin naglunsad sila ug hot pursuit operation kalabot sa shooting incident mga alas 6:50 sa gabii niadtong Nobiembre 28, 2024 sa Tzu Chi Village, Brgy. Sto. Niño, Kananga, Leyte.
Ang biktima naila lang sa ngalan nga “Migs,” 55 anyos, minyo, usa ka fish vendor, ug nagpuyo sa Brgy. Sto. Niño sa Kananga. Samtang ang suspek giila sad nga si “Don,” 38 anyos, minyo, usa ka construction worker, ug taga Tzu Chi Village usab.
Human nadawat ang impormasyon dali nga nirespondi ang kapolisan ug sa ilang pag-abot nag buy-od na ang biktima nga naka subsob sa yuta ang nawong. Sa gihimo nga inisyal nga imbistigasyon matud pa nagpalit ug barbecue ang biktima dihang kalit lang ni-abot ang suspek ug walay daghan alingasa diritso pusil sa biktima. Naigo kini sa dughan.
Dali usab nibiya ang suspek sa nahitaboan gani yano ra kining nag lakaw paingon sa ngitngit nga bahin. Apan nasikop ra usab dayon ang suspek ug na kompiska ang armas nga iyang gigamit sa krimen. Gidala kini sa estasyon sa kapolisan aron e-kustodiya. Samtang ang biktima gidala sa Kananga Municipal Hospital pinaagi sa Emergency Response Team. Aron unta masalbar ang kinabuhi apan gi-deklara kining dead-on-arrival (DOA) sa attending physician. “Through the tireless efforts of our Kananga MPS personnel, the suspect was apprehended without further incident. We extend our gratitude to the public for their cooperation and assistance that contributed to this outcome,” nagkanayon pa si Sudario. (Ni Josie Serseña / EV Mail November 25-December 1, 2024 issue)
