Dear Atty. Golo,
Dihay nangawat sa tindahan bali P 70.00 ang balor. Nadakpan, gipabayad og P 700.00 aron dili ikiha. Dakoa pod og patong oi, “times ten” man. Pila man diay silot anang mangawat? Ngano ang amo mga brgy. opisyal namaligya og semento para sa karsada wa man ma priso? Ang karsada nagka-lubak-lubak. Sakit sa lubot kay ang sakyan nga habal-habal, sige og untol-ontol, kon mabdos, kuyaw makaanak. Inig eleksyon, ang amo mga brgy. officials manghatag tagsa kalibo, ara ka buotan kay manghatag man og grasya, sana all.
Kusog modawat, Alat
Dear Alat,
Kon ang balor sa kinawat mokabat lang og P 70.00, ang silot “arresto mayor” o pagka priso hangtod 6 ka buwan, o “fine” kon multa hangtod P 5,000.00 (RA 10951). Ang nangawat wala na ikiha kay mibayad. “Times ten” ang gipabayad aron motagam. Peru ang mga politico wa motagam. Dili na man gani papule. Inig eleksyon, ang botante dawat diri dawat didto, inig lingkod, ang politico kawat diri, kurakot didto. Ang palit sa boto dili grasya kon dili disgrasya. Kon gusto ka malimpyo ang governo, ayaw na ibaligya ang imo boto.
Imo amigo, Manny G. Golo (EV Mail November 14-20, 2022 issue)
