Dear Atty. Golo,
Looya sa Philippines oi, napildi sa Japan. Niadto pod, pildi ta sa Indonesia. Sige kapildi ato mga player. Lupig diay ang player sa politico. Ang among mayor, congressman og governor, way pildi-pildi kay paliton man ang botante. Madayon ang eleksyon sa kapitan karong tuiga? Nus-a gani to? Modagan unta ko kay ang kapitan sige og “travel”. Kon may seminar, adto jud sa Boracay kay di man masabtan ang “module” kon anhi ra sa ato. Kon mga politico na lang ang atong paduwaon segurong daog kay ilang paliton ang referee, he… he…
Kapitan pohon, Marlon
Dear Marlon,
Segun sa balaod (RA 11462) ang Barangay og SK elections pagahimoon karong December 5, 2022. Pohon, kon dili ma postpone. Sa basketball, lingin ang bola. Kon ang Gilas Pilipinas karon pildi, angay doblehon ang practice aron sunod daog na. Lahi ang sports sa politika. Ang atong piniliay gihimong pinalitay. Kay ganahan man ka mo “travel” ang angay nimo apilan, binaktasay. Maayo pa kay gusto ka modaog ang Pilipinas. Ang mga politico, sila ra juy modaog. Kon ang atong player mga politico, di papuli, di mopasa, pildi gihapon ta kay buaya, ha… ha…
Imong amigo, Manny G. Golo (EV Mail July 18-24, 2022 Issue)
