Dear Atty. Golo,
Pakpak ko pagpangisog ni VP Sara sa “budget hearing.” Ngano pangutan-on man siya sa mga Kongresista, wa diay silay salig? Ngano man diay mahurot pag gasto ang 150 million nga “confidential fund” ni VP Sara sa 11 lang ka adlaw nga iya man na. Ang ila bitaw “pork barrel” wa man mangutana si VP. Kang BBM nga “confidential fund” binilyon man pod, wa man lagi pangutan-a nila, pabor-pabor ning mga Kongresista? Way dag-anan ang mga “congressman,” daghan sila, si VP lang usa. Dihay me “post” ang mga kongresman mora’g tiki gitukob sa agila. Pwede pod, mga buaya gitukob sa agila.
Di gusto’g lalis,
Ines
Dear Ines,
Ang “budget hearing” sa Kongreso importante aron masusi gi-unsa paggasto ang kwarta sa governo. Ang gahum sa kongreso pag “review” sa “budget” nga gisumeter sa “executive department” gihatag sa Batakang Balaod (Art. VI, Sec. 25, 1987 Constitution). Ang pagpangutana, importante nga himoon aron masayran og mabutyag ang kamatuoran. Ang way gitago, kon pangutan-on dili masuko. Ang ato mga opisyal sa governo, angay mosulti giunsa nila pag-gasto ang kwarta, kay ato nang kwartaha, dili ilaha. Okey lang kon tukbon ang buaya sa agila. Ang kuyaw, kwarta ang tukbon nila.
Imong amigo,
Manny G. Golo (EV Mail August 26-September 1, 2024 issue)
