Dear Atty. Golo,
Si Kristo gugma, ngano inig eleksyon pildi man ang gugma sa kwarta? Ang mga botante dili na maghuna-huna og Guinoo. Ang ila kon kinsa makahatag kwarta. Unsa may pagtulon-an ni Kristo bahin sa kwarta? Ang amo Kapitan miingon dili na karon panahon ni Kristo, panahon na sa alisto. Mao kon dunay ihatag, dawat deretso. Ngano naglisod man ang Pilipinas karon? Bugas, isda, hasta asin, atong gipalit gikan sa laing nasud. Sa importasyon, dagko man kaha og komisyon, sana all. Ang mga tawo tapulan na kaayo. Dili na manrabaho kay sige og sugal kay gusto og “instant” nga kwarta.
Way kwarta, Agata
Dear Ags,
Sa unang Domingo, ang Simbahang Katoliko nagsaolog sa solemnidad sa pagka Hari ni Kristo. Si Kristo nagda ug gugma. Ang demonyo naghaylo og kwarta. Matud sa Guinoo, ang gugma sa kwarta maoy ugat sa tanang dautan (1 Timothy 6:10 ). Ang demonyo nakasud sa governo pinaagi sa mga politiko nga namalit og boto. Naglisod ang mga tawo. Nakatawa ang mga politiko. Apan bisan unsa pa nila ka kusgan og pagka gamhanan, mahanaw ra na sila. Kay si Kristo mao ang tinood nga Hari gunad pa niadto, karon, og hangtod sa kahangtoran. Ingna si Kapitan, ang tinood nga alisto, dili mobiya ni Kristo.
Imong amigo, Manny G. Golo (EV Mail November 21-27, 2022 issue)
