Dear Atty. Golo,

Na postpone ang barangay og SK election? Sayang, pildihon jud unta namo nang among kapitan nga pelingon. Wa siya mosogot nga hudman ang “dumptruck” sa barangay aron maglubong sa ako Lolo. Wa kono moboto si Lolo niya. Kahibawo diay siya nga wa moboto si Lolo niya nga wa man siya magtan-aw pagboto ni Lolo? Iya diay nang dumptruck nga sa governo man na. Ang iyang Tiya nga gi “Covid” paglubong gi “service” ang “dumptruck.” Bukid man gud ning amo, maayo isakay ang longon sa “dumptruck” kay di man pwede sa habal-habal. Kon dili, magbaktas na lang me padong menteryo.

Nasuko, Tako

Dear Taks,

Ang Barangay og SK election giuswag ngadto sa katapusang Lunes sa Octobre 2023 (RA 11935).  Ang inyo Kapitan madinomtanon. Gigamit niya ang iya posisyon paglisod-lisod ninyo. Apan ayaw lang kasuko basin ma “high blood” ka.  Ang Guinoo nag-ingon, bulahan ang mga kabus og dinaog-daog kay ila ang gingharian sa langit (Mat. 5:1-12). Sa inyong pagbaktas, kamo mag-antos. Ang mag-antos masantos. Adto mo sa langit. Ang magsakay sa “dumptruck” nga hambogero, nagpahimos kwarta sa governo, pilipili ang servesyo, deretso inferno. Kon maka “break”, kawas purgatoryo.

Imo amigo, Manny G. Golo (EV Mail October 24-30, 2022 issue)