Dear Atty. Golo,
Ngano magboot man sila kon wa mohatag ang Presidente og “accomplishment report” sa iya first 100 days. Pag-ingon diay niya nga duna tay “functional government” unya ang gi-“hire”, the “bright and the brightest”, di ba “accomplishment” man na. Pareha lang sa ako asawa, inig-uli nako, sige pangutana kon nakadaog ko sa buwang. Mamakak na lang ko aron di makuhaan ako pohonan. Ang ato bitaw Presidente di man angay pangutan-on sa gastos pagtan-aw og “car racing” sa Singapore kay Presidente gud siya. Ang akong asawa, di na unta mangutana nako kay bana gud ko niya.
Way pangutan-anay, Biyay
Dear Biyay,
Ang paghatag og “accomplishment report” sa first 100 days in office gihimo sa nangaging mga Presidente. Kon ang mga tawo “excited” nga masayod kon unsa ang dagkong nahimo sa namuno-an alang sa kaayohan sa tanan, dapat dili kini ihikaw. Gani, obligasyon sa governo pagpahibawo sa katawhan, apil na giunsa paggastos ang kwarta, pinasikad sa “principle of accountability” (Art. XI, Sec. 1, 1987 Constitution). Ayaw katinga ang imo asawa mangutana nimo kay bana gud ka niya. Dili na kamo duha kon dili usa. Ang imong kalipay, maoy iyang himaya. Ang imong kapildihan, iya pod nga kasakitan.
Imo amigo, Manny G. Golo (EV Mail October 3-9, 2022 issue)
