Dear Atty. Golo,
Nakahilak ko pagkahibawo namatay si Queen Elizabeth. Bootan kaayo si Queen. Peru lagot ko sa among Kapitan kay “feeling queen.” Ang iya gusto maoy matuman. Wa jud niya paapila sa 4Ps ang ako ig-agaw nga pobre man unta tungod lang kay wa moboto niya. Di man gud unta na siya makadaog peru namalit man og tag Php 50.00; tulo ra guy labaw niya sa iya kontra. Karon sige pangupit aron mamalit na pod sonod. Ang “budget” para canal gi kupitan. Ginganlan gud na siya og “Kupitan.” Naa man konoy balaod himoon aron ang kapitan nganlan og “King o Queen”, tinood?
Fan ni Queen Elizabeth, Bebeth
Dear Bebeth,
Dili pwede ang paghatag og titulo sa pagkaharianon o kahalangdon (Art. VI, Sec. 31, 1987 Constitution). Ang atong balaod nagmando og kaangayan. Walay hari, walay ulipon. Demokrasya kita. Ang kapitan, sulogoon sa katawhan. Sa Englatera, naanad sila sa Monarkeya. Apan pinangga sa katawhan si Queen Elizabeth tungod kay gugma ang iya gigamit sa iya pag-alagad. Wa mangupit si Queen Elizabeth. Si Kapitan namalit og boto mao kusog mangupit aron mamawi. Alisdi siya ninyo aron di madaut ang queen. Kon siya gihapon ang inyo Kupitan, kuyaw tawgon siya og “Kupit Queen.”
Imong amigo, Manny Golo (EV Mail September 5-11, 2022 issue)
