Dear Atty. Golo,
Mahal na kaayo ang sibuyas bombay, tag PHP 600.00 ang kilo. Niadtong 2019 tag PHP 40.00 ra. Ang palit sa eleksyon diri sa amo niadtong 2019 tag PHP 1,000.00. Pag 2022, PHP 500.00 na lang kay way kontra. Me “decrease” man hinoon ang boto. “Illegal” man kaha ang “vote buying” ngano ang mga brgy. officials may namalit og boto? Wa hinoon tudloi ang mga tawo og pananom. Sa amo karon, daghang kawatan og manok. Daghan og problema. May paglaum pa kaha ta? Ang akong asawa pod, sige lang pangasaba. Ngil-ad og sinultahan, dili makaon og iro. Mausab pa kaha ning iyang sinultihan nga dili maka-on og iro?
Nagool, Adol
Dear Adol,
Ayaw gool-gool kay bag-ong tuig na. Pasalamat sa Guinoo nga nakaabot ta sa 2023. Ang problema sa produkto sa agrikultura wa masolbad sa namunoan kay ang ilang giapas ang pagpabilin lang sa gahum. Illegal ang “vote buying” (Art. 261, BP 881). Apan gihimo kini aron sila permanente nga molingkod sa pwesto. Ang ila motto, “to perpetuate in power, poor the people.” Kay kon ang mga tawo pobre, mobaligya jud sa boto. Resulta, padayon ang pangorakot. Hinaot makat-on na ta kay bag-ong tuig na. Bahin sa imo asawa, agwantaha ang iyang sinultihan nga dili makaon og iro, basin makaon na og iring.
Imong amigo, Manny G. Golo (EV Mail Dec. 26, 2022-Jan. 1, 2023 issue)
