Dear Atty. Golo,

Na postpone kono ang barangay og SK election? Taga Matalom ko. peru, mibalhin ko og rehistro sa Silago kay dagko ila palit didto. Dinhi sa ato, tag PHP 800.00, unya usa ra ka partido. Sa ila, duha ka grupo. Ang admin. tag PHP 3,000.00 ang palit. Ang pikas, tag PHP 2,000.00. Kon makadawat ko sa duha ka grupo, naa ko PHP 5,000.00. Makaboto gihapon ko bisan na postpone ang election? Ang Ormoc kono kay na tulo na laman ka barangay, tinood? Gi “merge” kono, unsa man na? Ang Matalom gusto ma sakop sa Southern Leyte, wa lagi. Mao adto na lang ko moboto sa Silago, Southern Leyte, he… he…

Bright voter, Roger

Dear Roger,

Niadtong Oct. 10, gipermahan ni PBBM ang balaod nga nag-uswag sa piniliay sa Barangay og SK sa 2023 (RA 11935). Og niadtong Oct. 8, gipahigayon sa Ormoc ang plebesito pag “merge” kon pagtingob sa 28 ka barangay ngadto sa 3 na lamang. Midaog ang “yes” kay ang mga opisyal sa Ormoc andam mosakripisyo sa ilang personal nga interest alang sa kaayohan sa kinabag-an. Ang Matalom wa ma “merge” sa Southern Leyte kay ang mga opisyal ang ilang kaugalingon lang ang gitan-aw bahala na ang mga tawo gilangaw. Ikaw pod way ikatabang. “Bright” lang sa kabu-ang, hu… hu…

Imong amigo, Manny G. Golo (EV Mail October 10-16, 2022 issue)