Dear Atty. Golo,
Naglagot ko so Mama ni Caloy nga nag “press conference” aron ingnon nga wa siya’y sa. Ingana jud nang mga ginikanan karon, mo kontrolar sa ilang mga anak. Pareha sa inahan sa akong uyab nga “seaman.” Suko ang Mama ni James kay hadlok ako’y mokuha sa “allotment.” Di ba way obligasyon ang anak mo suporta sa ginikanan? Wa gud sila pugsa paghimo og bata. Ilang obligasyon ang pagsuporta sa anak. Ang ginikanan, dili maka reklamo kon dili sila hatagan. Kon gusto silang tahuron, dapat ang anak ila respetohon.
Naglagot,
Balot
Dear Balot,
Ang ginikanan obligado mo suporta sa mga anak. Apan kon ang mga ginikanan tiguwang na, ang mga anak na pod ang mo suporta nila (Art. 195, Family Code). Ang suporta dili lang obligasyon, kon dili gugma sa relasyon. Ayaw’g sawsaw sa kinabuhi sa uban. Way matabang ang tsika. Iampo hinoon masulbad problema nila. Angay ka malipay sa “Gold” nga nahatag ni Caloy sa Pilipinas. Bahin sa kang James nga Mama, dapat mag pasalamat pod ka niya. Siya gu’y nag-utong. Ikaw, dawat la’g limpyo.
Imong amigo,
Kuya Manny FromMatalom\WithLove (EV Mail August 5-11, 2024 issue)
