Dear Atty. Golo,         

Nalooy ko sa tiguwang naglagkaw gikalitan og pa-ak sa iro. Bastos ang iro kay dapit sa bugan ang gipaak. Niadtong unang semana pod, si Jocelyn nagmotor didto sa Canganay, dihay mga iro nagbugno, milikay siya, na crash hinoon ang motor. Napangos siya hapdos kaayo. Nganong wa man dakpa ning mga iro? Ang bay sa among Kapitan gilibutan sa mga iro, mora man lang siya’g wa. Kinsa may atong sumbongan ani? Pwede isumbong nako sila sa Presidente? Naa kay number ni BBM kay miboto ra ba ko nila ni Sara.

Napungot, Ligot

Dear Ligot,

Wa koy number ni BBM. Peru segun sa website sa Malacanang, pwede nimo matawagan niining mga numero sa Presidential Complaint Center: 8-2498310 loc. 8175 or 8182, 8-736-8645, 8-736-8603, 8-736-8606, 8-736-8629, 8-736-8621. Segun sa balaod, responsibilidad sa LGU ang pagbakuna og paghipos sa mga iro. Kon way aksyon ang LGU, pwede isumbong sa DILG (Secs. 7,8 RA 9482). Ayaw lang ka deretso og sumbong sa Presidente kay ara siya ka busy. Unaha hinoon si Inday Sara aron sumbagon na sila.

Imong amigo, Manny G. Golo (EV Mail July 11-17, 2022 Issue)