Dear Atty. Golo,
Last week, fiesta ni Sta. Rosa de Lima, kinsa na siya? Paryente siya ni Laila de Lima, di ba bag-o pa siya nag “birthday”? Pila katuig si Laila de Lima na priso? Kadto si Ninoy Aquino, pila pod to siya katuig na priso? Ngano karon daghan man di ganahan ni Ninoy? Unsa may kalainan sa mga tawo sa una og karon? Lain poy ato, nus-a ang “filing” sa COC para 2025 election? Modagan unta ko pagka Mayor peru hadlok ko nga isyohan og pisot, kay napagya man gud gunad niadtong bata pa ko nga pisot ko. Diha man kahay tambag si Talyox Bacalso bahin sa pisot, unsa gani to? Kinsa man to si Tete Talyo?
Naglibog,
Burabog
Dear Borgs,
Si Santa Rosa taga Lima, Peru. Gi proklamar siya nga Santa niadtong 1671. Ang birthday ni Sen. Leila de Lima, Aug. 27,1959. Si Sen. de Lima na priso gunad sa 2017 hangtod 2022. Si Ninoy Aquino gipriso gikan 1973 hangtod 1980. Ang mga tawo sa una nahadlok apan nangisog dihang gipatay si Ninoy. Ang mga tawo karon, isog unta, ilaronon lang. Oct. 1-8, 2024 ang “filing” sa COC para eleksyon sa Mayo 2025. Si Talyox Bacalso mao si anhing Assemblyman Natalio Bacalso sa Cebu. Dihang gibombahan siya sa iyang kontra nga pisot siya, mibawos siya pagtubag, “Pangutan-a imo asawa.”
Imong amigo,
Manny G. Golo (EV Mail August 19-25, 2024 issue)
