Dear Atty. Golo,
Si Kumare nangutang nako adtong unang tuig. Karon, ako gitinglan, mo “deny” siya sa iya utang. Mangita og papel. Wa lagi me papel-papel kay misalig ko niya. Nakalimot man si Mare. Pareho siya sa Mayor sa Tarlac nga di na “maka ala-ala kay lumaki sa farm.” Diha pod koy uyab sa “high school,” pag reunion namo, nakalimot nga X ko niya. Ngano dali makalimot ang tawo? Ako ang alkanse kay dili ko kalimot sa ako bana. Nagbuwag me si James niadtong 2020 kay mikuyog sa iyang kabit. Gusto ko makalimot niya. Permi lang ko maghilak. Makatingil pa ko ni Mare sa iya utang? Plano na ko maghikog.
InLoveSaBana,
Rustica
Dear Russ,
Ang utang, bisan way papel, pwede matingil kon dili pa molapas ang 5 ka tuig (Art. 1145, New Civil Code). Daghang klase ang kalimot. Naay tinood nga nakalimot. Naa poy naglimot-limot. Kadtong imong X sa una, posible nakalimot kay basin wa siya kahibawo nga uyab mo. Si Kumare nimo, klaro nagpalimot-limot. Peru kadtong Mayor sa Tarlac, ang iya dili kalimot, kon dili pamotbot. Wa ka maalkanse. Si Kumare nimo maoy alkanse kay hapit na siya ma “amnesia.” Ayaw paghuna-huna og hikog. Samot nga di ka mabayran sa utang. Pagpuyo. Mouli lagi na si James kon ma “stroke” na.
Imong amigo, Manny G. Golo (EV Mail July 8-14, 2024 issue)