Dear Atty. Golo,
Nganong masuko man ang China kon mobisita ang Amerika sa Taiwan? Liwat ning among kapitan sa China, masuko kon mobisita ko sa ako ig-agaw kay taga kaspi kono, lain og partido. Ang akong maguwang pod toa nag trabaho sa Taiwan. Namabdos siya didto. Ang nakamabdos dili mangasawa niya. Ang akong maguwang sugot lang paangkan kay aron naa siya’y anak kay hapit na man siya ma 40. Ako 15 pa. Pwede nako pabisitahon sa balay ang akong amigo bisan di mosogot si Mama kay gikapoy na ko og “date” adto sa hagonoyan. Ingon si Mama kasohan niya og rape si Poloy kon mamisita, pwede ba?
Imong amiga, Ella
Dear Ella,
Niadtong unang semana, mibisita sa Taiwan si Nancy Pilosi, ang speaker sa US Congress. Gikan sa Taiwan, miadto pod si Pilosi sa Japan. Nasuko ang China kay di man siya gusto nga maglain ang Taiwan kay para sa China, sakop niya ang Taiwan. Na “insecure” inyo Kapitan. Morag ang China iya natakdan. Ang China wa makapugong sa U.S. kay ang America dunay kagawasan. Bahin ni Poloy, kon ang iyang pagpamisita nimo aron lang mosamot ang inyong pagka higala, wa nay problema. Apan kon hilabtan ka niya, mahimo siyang kasohan og rape sa imong Mama kay below 16 pa man ka (RA 11648).
Imong amigo, Manny G. Golo (EV Mail August 8-14, 2022 issue)
