Dear Atty. Golo,         

Ngano karon gitawag man og “National Heroes Day” niadtong unang Lunes? Ang mag paka “hero” kay mamatay. Maayo pa’g dili hero basta buhi. Inig eleksyon ang mga politiko mamalit og boto, dako og gasto, mga hero pod na sila? Ang akong bana, magpa-hero-hero pod. Bisan way sweldo, mobangka og inum sa mga amigo. Inig kahubog akoy pahimungtan. Bisan di ko kaligo, pugson magdog me. Lami hinoon. Naka utang siya sa imnanan pikas eskina. Ako’y gitinglan sa tendera. Pwede diay ko mobayad sa utang sa akong bana nga wa man ko kahibawo giinom lang to nila, alkanse ko.

Ulirang asawa, Agata

Dear Agata,

Ang katapusng Lunes sa buwan sa Agosto gideklarar nga “National Heroes Day”, paghandom niadtong wa nato mailhi apan nagpakamatay og nakigbisog alang sa atong kagawasan. Ang mga politico nga mamalit og boto, dili hero. Sila ang “corrupt numero uno” kay gihimo ta nilang ulipon sa kwarta. Ang imo pong bana, hambogero, dili hero. Bahin sa iyang utang nga wa ka kahibawo, pwede ka di mobayad gawas kon naka benefisyo ang inyong familya (Art. 94 (3), Family Code). Peru, nagdog mo unya lami pa. Na “benefited” ka. Bayre na lang, aron ikaw ang  “hero” sa imo bana.

Imong amigo, Manny Golo