Dear Atty. Golo,         

Last week, holiday kay Bonifacio Day, fiesta pod diay ni San Andres. Pareho ra na sila?  Niadtong unang semana birthday pod ni Ninoy Aquino, naa ra bay salida nga “Martyr or Murderer” si Ninoy, motoo ka?  Si San Andres, “hero” pod to siya? Ang ako asawa, isog kaayo. Usahay iya ko sumbagon. Di ko mosokol. Gi kantyawan ko sa ako mga barkada nga “Anders” kono ko. Nauwaw ko. Ako unta siya sumbagon peru giingnan ko ma priso kono ko kay dunay VAWCI, unsa man na? Kon ang asawa mo kulata sa bana, dili siya ma priso, “unfair” kaayo. Kon patyon ko sa ako asawa, ma “hero” ko?

Gusto ma hero, Nicasio

Dear Nicky,

Nov. 30 ang kapistahan ni San Andres, ang unang apostoles. Igsoon siya ni San Pedro. Martyr, gipatay tungod sa paglaban sa pagtoo. Lain pod si Andres Bonifacio. “Hero” siya kay gipatay paglaban sa atong nasud. Si Ninoy gipatay paglaban sa demokrasya. Bahin sa VAWC, kon “Anti Violence Against Women and Children” (RA  9262), gipasar kini aron pag protektar sa mga kababayen-an og  kabataan. Ayaw sumbaga ang imo asawa kay pinakaslan gud na nimo siya. Pasumbag lang. Kon mapatay ka sa imo asawa, mamora ka og “hero” kay daghan mang mohatud inig lubong nimo.

Imong amigo, Manny G. Golo (EV Mail November 28-December 4, 2022 issue)