Dear Atty. Golo,
Ngano mang reklamo man mo og langaw nga mga opisyal man sa governo ang tag-iya sa langaw. Sa ato pa, ang mga langaw opisyal pod. Mibotar gud mo nila. Gihatagan man gani mo tag Php 1,000. Natural, dako man ug gasto, bawi-on jud. Minilyon gud ang income kada harvest sa poultry. Kamong me reklamo mga baratohon. Ang poultry mahalon. Mahal pa ang langaw ninyo. Sige mo’g reklamo wa moy mahimo. Pareha anang moreklamo nga si VP sige sakay helicopter. Ang amo gani konsehal sakay man ambulance namista. Opisyal ang sakay, opisyal ang lakaw. Maayo pa mo manghilom.
Gwapo nga poultry manager, Roger
Dear Roger,
Ang katawhan maoy labing gamhanan samtang ang mga opisyal sa governo mga piniyalan lamang kay sila pinili man lang sa katawhan (Art. II, Sec. 1, 1987 Constitution). Ang mga opisyal sa governo mao untay “leader” aron sila ang mag-una sa pagkinabuhing matarong. Apan kay gipalit man nila ang ilang posisyon, nahimo na silang “dealer.” Ang ilang gihunahuna ang pagpakadatu lamang aron magpabilin sa gahum. Ang piniliay ilang gihimong pinalitay. Para nimo, importante ang langaw kay sa tawo. Maayo jud ka pagkaliwat sa imong amo. Ang porma tawo, apan ang huna-huna lagong.
Imong amigo, Manny Golo (EV Mail September 12-18, 2022 issue)
