Dear Atty. Golo,
Naa lagi nag “viral” nga ang Head sa OWWA nagkaon kintahay og lugaw peru gipakita ang relo nga Patek nga mahalon kaayo. Mas mahal pa kono ang Patek kay sa Rolex? Tagpila man na? Unsa may gibuhat sa taga OWWA sa atong mga Overseas Filipino Workers nga gidaogdaog. Diha man kahay OFW nga gipatay sa Kuwait. Hilas kaayo ang naa sa governo nga mag “display” sa mga borloloy unya ang ato mga tawo way gikaon. Naay seboyas mahal pa sa itlog. Mas importante diay ang sibuyas kay sa itlog? Maayo unta mahalin ang itlog sa akong bana kay ako ibaligya aron ma puslan.
Naglisod, Salud
Dear Sally,
Karon nga ang katawhan nag-antos sa kamahal sa panaliton og nagbangotan sa pag “rape” og pagpatay sa Filipina nga OFW didto sa Kuwait, dili makiangayon nga ang opisyal sa governo magpasikat sa iya katigayonan. Mao ni gitawag og “ostentatious display of wealth.” Angay ang naa sa governo magpuyo og yano nga kinabuhi (RA 7160). Di ko sweto og relo kay wa man ko’y relo. Ako gitan-aw sa google, mas mahal ang Patek kay sa Rolex. Minilyon ang presyo. Ang sebuyas mimahal pod. Hasta itlog. Peru, mas importante ang itlog. Kay ikaw, di unta ka matawo kon ang imo Tatay wa pay itlog.
Imo amigo, Manny G. Golo (EV Mail Jan. 31-Feb. 5, 2023 issue)
