Dear Atty. Golo,         

Nindot kay San Miguel og TNT ang championship sa PBA. Mohatag man kaha si June Mar Fajardo og tag Php 200.00 kada point niya. Nanugon man kono ang iyang Mama. Junior na si June Mar? Nus-a iya birthday, June o March? Daghan kaayo ang langaw sa among barangay kay naay poultry. Maayo unta ang mga tag-iya og poultry manghatag pod tag peso kada langaw. Bawibawi ba kay gahapon kapin libo ka langaw mipilit sa “fly catcher.” Pwede magbuhat og ordinansa ang barangay aron mapugos ang mga tag-iya sa langaw pagbayad og peso kada langaw? Kinsay mohimo sa ordinansa, ang tanod?

Ka Tropa, Paula

Dear Ka Tropa Paula,              

Si June Mar natawo niadtong Nov. 17, 1989. Anak siya ni Bonifacio og Marites. Sa wa pa mamatay iya Mama, giingnan niya si June Mar nga mo “share” sa iya “blessings.” Mao nga naa siya scholars sa U.C. Karon nga nakaabot ang SMB sa finals, mohatag siya og Php 100,000.00 sa charity plus Php 200.00 kada point niya, unya tag Php 1,000 ang 3 points. Ang Sangguniang Barangay maoy mopasar og ordinansa (Sec. 391, RA 7160). Ang tanod, igo lang mopatuman. Kon matinood ang imong damgo nga ordinansa aron bayran og tag peso kada langaw, unya makakuha ka og 1,000 ka langaw, mora pod ka naka 3 points.

Imong amigo, Manny G. Golo (EV Mail August 15-21, 2022 issue)