Dear Atty. Golo,
Nakakita ko sa “you tube” sa session sa Cagayan de Oro alegre kay perting lalis sa Vice Mayor og Konsehal. Dili pasultihon sa Vice ang konsehal misinggit og “point of order,” unsa man na? Sa ato, di tingali sila maglalis kay “straight” man. Tag Php 800.00 ila panghatag. Gahapon, mohigop unta ko sa sabaw sa kinilaw kay di na man ko paimnon. Atar, diha may langaw. Wa na lang ko mokaon. Maayo unta naay ordinansa dili pasudlon ang langaw. Mahadlok ko moingon nga magbuhat sila. Kinsa may mobadlong sa langaw, mao pod ni akong “point of order.”
Di lang ta mamista, Sonia
Dear Sonia,
Happy fiesta. Ang “Point of Order” nag pasabot nga dunay “rules” atol sa “session” nga nalapas og angay tarongon sa “presiding officer” (Robert Rules of Order). Ang imo “concern” bahin man sa langaw, “point of health” kini. Ang RHU maoy angay mosolbad. Peru ang sanggunian pwede magpasar og ordinansa pag “regulate” sa mga poultry nga “source” sa langaw. Ang tawo unta maoy mas gamhanan kay mao may mopili sa mga politico. Apan kay gibaligya man ang iyang gahum sa pagboto, ang tawo hadlokan na kaayo. Mahadlok sa politico. Mahadlok sa langaw.
Imong amigo, Manny G. Golo (EV Mail July 25-31, 2022 Issue)
