Dear Atty. Golo,

Ang mipusil kono sa Governador sa Negros, “army” kono nga “AWOL”. Di ba ang “awol” langgam man na ang tawag “ngiw-ngiw”? Maayo kay di “wak-wak.” Ang akong bana sa una, Army. Miadto sa Mindanao niadtong 2016 kay nag O.B. Abe nako og “Official business.” Oban man diay og Baje. Hangtod karon wa mouli. Wa na me “communication.” Naay nanghagad nako og menyo nga “senior.” Maayo kono unta kon makasal me aron makasunod ko sa iya pension. Pwede na ko makasal niya? Pwede man kono magminyo og usab kon kapin na upat ka tuig na “missing” ang bana, unsa ako buhaton?

Kaminyoon, Corazon

Dear Cory,

Ang sitwasyon diin ang nahibilin nga kapikas pwede magminyo pag-usab, mao kon ang lain nga kapikas wa na igkita upat na ka tuig, og dunay reasonable nga pagtoo nga patay na siya (Art. 41, Family Code). Ang imong bana, mibiya nimo kapin na sa unom ka tuig. Peru, wa kay proyba nga patay na siya. Pangitaa hinoon. Kon di nimo igkita, mosang-at ka og petisyon sa korte pagdeklarar nga wala na ang imong bana. Kon mo deklarar na ang korte, pwede na ka magminyo pag usab. Bahin sa Army nga  “Awol”, ang pasabot “Absent Without Leave”. Ang “Owl”, ngiw-ngiw, ig-agaw sa mingok.

Imong amigo, Manny G. Golo (EV Mail March 6-12, 2023 issue)