Dear Atty. Golo,
Ngano ang mga kongresista lisod-lisoron man nila ang budget sa Office ni VP Sara? Wa silay “parliamentary courtesy.” Ang budget sa “office” ni PBMM, “approved without thinking.” Giinitan nila si VP Sara. Mao nga di siya motubag. Mao nga di na lang mo attend si VP kay “useless” lang. Pareho sa ako anak, “useless.” Wa motingog naho. Nasuko siya kay ako perme singkahan ang iya bana. Gikalimtan na niya ako nga nagpadako sa iya bukog. Way ikabawos. Pareho sila “useless.” Di ba naa sa Biblia nga ang anak motahud sa ginikanan?
Nagmahay,
Mommy Iyay
Dear Mommy Iyay,
“Useful” ang budget hearing aron matuki gi-unsa pag gasto ang kwarta sa governo og ang mga tawo mahibawo kay sila man ang tag-iya sa kwarta. “Useful” ang budget hearing aron ma esplekar ang pag gasto sa kwarta. Peru mora na lang og “useless” kay di man motubag si VP. Ang mga Kongresista pod wa mangutana sa budget sa Presidente. Ang ila kahilum, “useful” sa ilang bulsa. Ang Bibliya nagsugo nga ang anak motoo og motahud sa ginikanan. Apan ang ginikanan, dili pod mopalagot sa anak (Eph, 6:1-4). Ayaw sila singkahi. Higugmaa og panggaa aron ka nila tahuron og pasidungan.
Imong amigo,
Manny G. Golo (EV Mail September 23-29, 2024 issue)
