Dear Atty. Golo,
Ngano gipaundang man sa Mayor ang mga vendors didto sa Virgin Island nga naninda og saging og sea foods. Illegal diay na. Mahal kono kaayo. Natural nga mahal kay nindot man ang lugar. Unya, lisod pod pagkuha anang kinsahon og isda nga dili boriring. Ang Mayor nga mamalit og boto, maoy angay pugngan kay “illegal” man ang pagpalit og boto, di ba? Mas mahal ang palit sa boto kay tag Php 3,000.00 sa ubang lungsod. Mga turista man kaha to sila, dili angay mo reklamo kon mahal. Wa man sila pugsa. Kon kaon ang ilang gusto, dili sila angay magturista. Ang maayo nila, mamista, ha… ha…
Naninda og saging, Daling
Dear Daling,
Ang Mayor miaksyon lang kay diha may reklamo. Segun sa balita, wa paundanga ang mga manindahay, gibalhin lang sila ngadto sa “main land”. Nag investigar ang governo. Maayo pod unta iapil nila pag-investigar ang namalit og boto. Ang kurapsyon nagsugod pagpalit og boto sa eleksyon. Usa ka “criminal offense” ang pagpalit og boto nga nagtangag og silot pagka bilanggo hangtod 6 ka tuig (Sec. 261, BP 881). Hina-ot ang mga politico di na mamalit og boto. Ang tinda sa Virgin Island mao na lay paliton. Ang kuyaw, ang pabayron ang tresorero. Alkanse na pod ang governo, hu… hu…
Imong amigo, Manny G. Golo (EV Mail August 1-7, 2022 issue)
