Dear Atty. Golo,
Init kaayo ron. Pag-uwan gahapon, naligo jud ko kay ang uwan sa Mayo maka-ayo, ingon si Lolo. Buotan pod ning China kay gipauwanan og tubig ang Coast Guard nga naghatod og pagkaon didto sa Scarborough. Kon maldito pa ang China, “missile” unta ang gitira. Di na lang ta magsokol-sokol sa China kay wa tay dag-anan. Ila man pod nang Scarborough. Daghang mga Insek nga negosyante nga buotan. Sana ma probinsya na ta sa China aron ta moasenso. Insakto jud ang sulti ni Tatay Digong.
Ganahan og Insek,
Chang Kay Sek
Dear Mr. Chang,
Niadtong 2016, gihukman sa Permanent Court of Arbitration (PCA) nga ang Scarborough Shoal sulod sa Exclusive Economic Zone (EEZ) sa Pilipinas. Ang Pilipinas maoy dunay katungod diha sa Scarborough Shoal. Ang gihimo sa China pag watercannon sa atong gagmayng barko dili makiangayon. Gi “bully” ta sa China. Gigamit niya ang iyang gahom pag-ilog sa atong kadagatan diha sa WPS. Ang China dili motahod sa “arbitration” kay siya ang hawod. Ganahan ko og Insek. Peru, di ko ganahan sa China.
Imong amigo,
Manny G. Golo (EV Mail April 29-May 5, 2024 issue)
