Dear Atty. Golo,
Love kaayo nako si Rudy. Magpakasal na me “next month.” Mihangyo siya nako nga imbis akoy moda sa iya apelyedo, siya’y moda sa ako. Ang iya apelyedo, IRING. Nahadlok siya nga kon moda ko sa Iring inig ka minyo namo, basin kono ko mag-iring-iring. Ang iya gusto, siya moda sa ako apelyedo nga Agwanta aron kono dili me magbuwag kay mo-agwanta man siya. Kon mosogot ko, unya magkabuwag jud me “in the future,” unya magminyo siya og lain, ang iya bag-o asawa, makada hinoon sa Agwanta? Palihug tambagi ko kay mora di ko ka agwanta kay dako-dako ni nga problema.
ExcitedMaAsawa,
Andresita
Dear Andresita,
Way balaod nga nagtugot sa bana pagda sa apelyedo sa asawa. Ang asawa lang ang gihatagan og “option” pagda sa apelyedo sa bana (Art. 370, New Civil Code). Sa ato pa, dili pwede ang gusto ni Rudy nga moda sa Agwanta. Sa laing bahin, ikaw pwede di moda sa Iring kay mahimo ang asawa nga dili moda sa apelyedo sa bana. Peru, tungod kay “love” man nimo si Rudy, “willing” jud ka mahimong Iring. Apel pod na sa inyong sa-ad pohon nga “for better and for worse.” Ayaw problemaha ang apelyedo. Atangi hinoon ang kinaiya ni Rudy kay mora’g need jud siya nimo agwantahon.
ImongAmigo,
Manny G. Golo
Manny G. Golo (EV Mail November 25- December 1, 2024 issue)
