Dear Atty. Golo,
Nagsugod na ang “Campaign Period”? Diha man konoy ganahan sa Inferno kay nindot. Unya pag-abot niya ara mang inita. Nangutana kono siya ni SP (San Pedro) nga nakakita siya sa “you tube” nindot ang Inferno. Giingnan kono siya ni SP, nga ang iyang nakita nga nindot ang Inferno, “campaign period” pa to. Tinood tingali kay pag kampanya sa 2022, ang Team Unity mora’g langit. Karon, mora na’g Inferno, arang kagubot. Gipa priso ni BB (Batang Bangag) si TD (Tatay Digz). Kinsa may insakto nila?
MuseSaTeamUnity,
Charity
Dear Charity,
Ang “campaign period” sa mga local candidates nagsugod sa March 28 hangtod May 10 (Comelec Res. No. 11086). Bahin sa Inferno nga nindot pag “campaign period” pa, motoo ko kay daghang demonyo nga kandidato, modaog ra ba perme. Karon kay kwaresma man, giawhag ta nga magbasol og mobiya sa sala. Matud pa sa Psalm 116:11 ang tawo botboton. Aron di ka maglibog, ayawg tuo ni TD o BB kay mas botboton pa na sila nato. Kon gusto ka malangit, salig sa Guinoo kay Siya matinud-anon (Jn. 14:16).
ImoAmigo,
Manny G. Golo
Manny G. Golo (EV Mail March 24-30, 2025 issue)
