Dear Atty, Golo,
Birthday ni Cory adto una semana? Dungan man kono sa Fiesta sa Bato? Kon wa pa ilara ni Cory ang mga tawo, wa untay “people power.” Siya diay ang “queen” sa “fake news.” Madyongera pod to si Cory. Diha man gani “episode” sa “Maid in Malacañang” nga nag mahjong si Cory uban sa mga Madre. Motoo jud ko kay sikat man ang Director, si Darryl Yap. Hakog pod sa gahum si Cory. Bisan di katigo, nag Presidente, usa ra lagi ka termino. Lupig si Cory sa amo Mayora, way puli-puli bisan tiguwang na.
Wa mo belib ni Cory,
Imee
Dear Imee,
Jan. 25, 1933 ang birthday ni Cory. Ang mga Madre sa “Carmelites” nanghimakak sa maong estorya. Matud sa mga Madre, nag ampo sila adtong tungora alang sa kalinaw sa atong nasud. Ayaw na hinganli og dili maayo si Cory kay wa na siya. Maayo pa iampo nimo ang iya kalag. Pasalamati pod siya sa iya pagpabalik sa demokrasya. Bahin sa Direktor sa salida, binayran lang siya. Wa pa siya matawo adtong tungora. Didto pa siya sa tiyan sa iya Mama. Basin ang iya nakit-an nga nag mahjong, ang inyo Mayora.
Imo amigo,
Manny G. Golo
Manny G. Golo (EV Mail JAN. 20-26, 2025 issue)