Dear Atty. Golo,
Tinood wa nay “budget” ang Philhealth, kay gikawat? Ang VP, 600 milyon ang “confidential fund” nga way klaro. Labaw na ang Presidente kay binilyon ang iyaha. Di pod palupig ang mga senador og mga kongresista. Nailad me pag 2022. Me “vote straight” me sa Uniteam. Kadawat gud me og tag dos mil. 30 milyon me nailad. Nagbasol me. Nasuko pod kay ginganlag me TANGA. Maayo unta kami tanan di na pailad sa 2025 pohon, unsaon man. Maayo unta mawagtang tanang korakot. Peru inig eleksyon modaog man! Di na jud ni sila mapulihan? Maayo pamatyon silang tanan.
GustoMoasaenso,
Maximo
Dear Max,
Ang Philhealth dunay “budget.” Giwagtang lang ang “subsidy.” Ayaw na lang pagbasol nga nailad. Don’t worry. Be happy. God is in control. Ayaw kasuko nganlag kag tanga. Matud ni Pope, okey lang tanga “huwag lang araw-arawin.” May paglaum pa ang Pilipinas. Ikaw ang paglaum. “Sovereignty resides in the people” (Art. II, Sec. 1, Constitution). Di na kinahanglan patyon ang mga politiko. Kay ikaw ang nagpili nila. Korakot sila kay korakot man pod ka. Aron sila mapulihan og mga buotan, ayaw na ibaligya ang imo boto. Ikaw ang angay mag bag-o. Happy New You.
Imong amigo,
Manny G. Golo
Manny G. Golo (EV Mail December 23-29, 2024 issue)
