Dear Atty. Golo,
Kuyawan ko naminaw ni Inday Sara ipakubkub kono niya ang lubong ni FM aron ilabay sa West Philippine Sea. Kinahanglan bantayan ang lubong ni FM kay basin tinud-on ni VP. Iya sinultihan mora way bu-ot. Liwat si Inday sa iya Tatay? Duna man kahay “psychological incapacity” si FPRRD, unsa man pod na? Kinsa gani to nag-ingon ipa “psychological test” si Inday? Iapil pod lamang ang amo Governor og Congressman, nagsabot way kontrahay sa eleksyon, nag iyahay og “file.” Ngano ato mga “leader” sinyalan man?
PoliticalAnalyst
Mam Pacit
Dear Mam Pacit,
Si VP Sara dunay bu-ot, wa lang ka kauyon. Si Cong. Jay Khonghun (1st District, Zambales) mao ang nag-ingon nga maayo mo pailawom og “psychological assessment” ang ato VP. Ang “psychological incapacity” mao ang kapakyas sa pagbuhat sa mga batakang obligasyon sa kinabuhing minyo. Mao ni maka pa deklarar sa kaminyoon nga “null and void” (Art. 36, Family Code). Okey lang ang mga politico mag-away, basta para sa katawhan. Peru kon mag-away alang sa “personal” nga kaayohan, mao nay sinyalan.
Imong amigo,
Manny G. Golo
Manny G. Golo (EV Mail October 21-27, 2024 issue)
