Dear Atty. Golo,
Gihimo ko sa amo Kapitan nga “leader” sa purok. Ingon si Kap “vote straight” aron usa ka libo. Open ballot kono aron maseguro. Pwede diay tan-awon ang balota? Kon e open ang balota, mora pod diay sa Bikini Open. Nag-away ra ba me sa ako bana kay miadto sa Cebu, mitan-aw sa Bikini Open. Wa pa jud magsulti nako. Ang ako Pare ang nagtug-an kay mitan-aw pod siya. Ang ako bikini, wa hinoon niya opena. Kon di kono ko modawat pagka “leader,” di me pasakyon sa “ambulance” kon masakit. Unsa ako buhaton?
GustoMangopras,
Ditas
Dear Ditas,
Ang boto, sekreto og sagrado. Dili kini pwede paliton. Hangtod 6 ka tuig pagka priso ang silot sa mamalit og magbaligya og boto (Arkt. 261, BP 881). Si Kapitan dili “leader” kon dili “Dealer.” Gusto siya nga ang inyo boto mapunta sa mga Korakot nga Politiko. Ayaw kahadlok ni Kapitan kay ikaw ang Hari, samtang siya piniyalan lamang. Isumbong sa Comelec aron kasuhan si Kapitan nga abusado. Okey kaayo kon di ka kasakay sa ambulansya. E “reserved” lang na niya. Iboto ang kandidato nga di mamalit og boto.
Imo Amigo,
Manny G. Golo
Manny G. Golo (EV Mail APRIL 28-MAY 4, 2025 issue)
